Quater onns plein novas experientschas

Il temps sco meinafatschenta dil Center Fontauna va extrem spert. Da rutina ni lunguriala san ins buca discuorer. Mintga di porta zatgei niev e lai far novas experientschas. Ed uss eis ei gia quater onns.

Avon quater onns ha mia lavur sco meinafatschenta dil CF – ni da lezza uras il Center da sport e cultura – entschiet. Dapi lu ei buca mo il num semidaus. Gia avon l’entschatta ufficiala da mia lavur ils 1 d’avrel haiel jeu gia astgau prender part a sesidas dalla cumissiun da baghegiar ed il schaner 2018 alla presentaziun dil project da valurisaziun dil Center Fontauna. En la sala Peter Kaiser fullanada era vegniu presentau il project ensemen cun il project per il hotel Acla da Fontauna. Previu era d’entscheiver cullas lavurs da construcziun la primavera 2019. Vegniu ei la finala tut auter.

Luvrar vinavon vid il project

Suenter ch’il cussegl da vischnaunca a tarmess il project dalla glatscha giu ha ei giu num per la cumissiun da baghegiar da prender danovamein catsch ed aunc ina gada ir suls cudischs per ademplir las pretensiuns dil cussegl. En numerusas sesidas ei vegniu filau vinavon vid il project existent. Dasperas ei era vegniu luvrau ora in concept da menaschi ed il messadi per la nova tractaziun dil project pil cussegl da vischnaunca ed era la damonda al cantun per ina contribuziun cantunala per il Center Fontauna.

Sustegn finanzial dil cantun

Eifer quella lavur ha ei era dau discuors denter las duas vischnauncas da Tujetsch e Mustér. La vischnaunca da Tujetsch ch’encureva ina persuna per menar il Bogn Sedrun ha sistiu sia tscherca ed ei secunvegnida cun la vischnaunca da Mustér da surdar la gestiun dil Bogn Sedrun sco mandat al Center Fontauna. Aschia s’auda era quei dapi il fenadur 2020 tier mia lavur quotidiana. Ina collaboraziun denter las vischnauncas ei era stau in punct principal per il sustegn finanzial dil cantun Grischun d’in milliun francs. Quella novitad ch’ei vegnida si da Cuera ils 18 da zercladur 2020 ei stau in fetg bi mument ed era in mussament ch’igl ei vegniu fatg bia e buna lavur a favur dil Center Fontauna.

Il “gie” all’urna

Suenter ch’igl ei vegniu stuschau pliras gadas il termin per la tractaziun el cussegl da vischnaunca e la votaziun dil pievel eis ei lu stau aschi lunsch ils 27 da settember 2020. Vischinas e vischins ein ir stediamein a votar ed ha cun clara maioritad dau glisch verda al project. In punct culminont el project ha fatg grond plascher a tut ils cumpigliai.

La lavur ei aunc ditg buca a fin

Mo suenter la votaziun ha ei dau ina schliata novitad. Entras la moda e maniera co il project ei vegnius screts ora da sias uras ei vegniu clar ch’il biro huonder bisquolm architects sa buca semplamein cuntinuar culla realisaziun dil project. Scret ora era numnadamein sulet la lavur tochen tier il preproject e la damonda da baghegiar. La lescha da submissiun prevesa en quei cass che la realisaziun dil project ei ina autra lavur e sto puspei vegnir screta ora. La lescha lubescha buca ch’il biro d’architectura che ha fatg il preproject astga offerir per la realisaziun. Aschia ha quella lavur stuiu vegnir screta ora e vegnir surdada. La lavur ha la finala il biro da planisaziun cavelti derungs AG da Laax survegniu. Il meinaproject Gioni Cavelti ha igl empriu giu da surprender las informaziuns dil project e selavurar en quel cun siu team. Quei ha duvrau temps ed aschia ei tut puspei seretardau.

La gronda lavur entscheiva uss

Igl atun ein las sesidas da cumissiun puspei s’intensivadas. Ei vegn discutau detagls per saver scriver ora las lavurs che ston era setener vid la lescha da submissiun. Ussa ein gia ina buna part dallas lavurs surdadas. Era per il Center Fontauna vegn ussa denton il temps il pli stregn. Il menaschi resta aviarts duront las lavurs da construcziun. Ina gronda sfida per las fatschentas da construcziun e per collaboraturas e collaboraturs dil CF. Ils davos dis eis ei da studegiar nua ir cugl uorden che sto per part vegnir allontanaus ord las stanzas per che las interpresas san luvrar. Ina colonna containers ein la sligiaziun, quei che munta denton da ir cun uorden dad in cantun en l’auter. Da l’autra vart vegnan denton era occurrenzas che duein malgrad las lavurs haver plaz ellas localitads dil CF. Tut quei procura per beinenqual cuorta notg e rumpatesta co organisar tut per che tuts ein cuntents e ch’il menaschi funcziuna. Da l’autra selegrel fetg ch’ei entscheiva finalmein. Ei vegn a dar in intensiv, mo interessant temps.

Facebook
Twitter
LinkedIn
Pinterest

Schreibe einen Kommentar

Deine E-Mail-Adresse wird nicht veröffentlicht.

Davosas novitads
Subscribe to our newsletter

Sign up to receive updates, promotions, and sneak peaks of upcoming products. Plus 20% off your next order.

Promotion nulla vitae elit libero a pharetra augue