El plaunterren dalla halla da tennis ei tut vegniu scarpau ora. Mo era el foyer dalla halla da gimnastica ha ei dau ruosnas e preits han stuiu svanir.
Las lavurs han entschiet el plaunterren dalla halla da tennis. Tut ha stuiu svanir, plattas da betun, preits endadens ed ordadora. Tut ei vegniu scarpau ora e vegniu dismess.
El foyer avon la halla da gimnastica eis ei medemamein vegniu luvrau e scarpau ora preits. La gronda lavur ei stau da tagliar ora ina ruosna el plantschiu sut giu ed atras el tschaler da schurmetg civil. Quei han ins stuiu far per saver sfunsar il plantschiu existent per rodund 50 centimeters ed aschia far plaz pigl ascensur che meina naven da quei foyer (plaunterren) si ell’alzada sura. Perquei ch’ei ha dau problems da furniziun da parts da metal han ins gest aunc silla davosa secunda puspei saviu betunar quella ruosna aschia ch’ils camps san vegnir e puspei duvrar ils dormitoris el tschaler da schurmetg civil.
Vinavon ei era vegniu midau ina plunas lingias els locals d’urdeins e tut las autras stanzas che sesanflan el plaunterren parallel culla halla da sport. Ord quei motiv havein nus stuiu ir cun bia material da far gimnastica mo era cun, tribunas, meisas e suppias en ils containers ch’ein plazzai entuorn il Center Fontauna.
